تنويه هذه المقالة عبارة عن دورة تدريبية مكتوبة في مجال العمل الحُر
حتأخذ من وقتك أكثر من ساعة ونص لساعتين بالمتوسط، لتقدر تستفيد منه لاحقًا
لو أنت لسا طالب ومشغول في التعليم عن بعد الخاص بالجامعة، فما تشتت نفسك.
ركز على دراستك فهي أهم شيء في هذه المرحلة، واِعمل save للمقالة وبتفتحها في إجازة الصيف
وشير برضو لتساهم في نشر هالعلم ويكون صدقة جارية عني وعنك.
نبدأ على بركة الله؟ بسم الله
عمرك جربت تصحى بدري عشان جدولك مُكتظ بالمهام والأعمال؟
بتعرف إنه تصحى بدري مش دايمًا اشي سهل! بس صدقني اِشي مُمتع!؟.
بخليك تحس بقيمة ونعمة الوقت، وإنك إنسان مُنجز وصاحب تغيير ولو بسيط "على قد يومك".
طيب، خلونا نحكي اليوم عن شغلة كتييير مُهمة من وجهة نظري، وهي.
كيف نستثمر أوقات الفراغ "يلي زادت بهالأيام" بطريقة حكيمة وصحيحة لتعلم مهارة جديدة محتاجها العالم وفي طلب عليها في سوق العمل الحر.
في ناس ممكن تحكي أطور لغتي، أحضر أفلام، مسلسلات، أقرأ كتاب، رواية ..الخ
من أنشطة كسر الروتين المشهورة، ولكن
ماذا لو استثمرنا هذه الأوقات لتعلم مهارة جديدة محتاجها العالم وفي طلب عليها في سوق العمل الحر
وحولنا هذه الفترة لفترة تعلُّم مع تجربة عمل بسيطة حتفيدنا لقدام!
أنت يا محمد بدك تضلك تنكد علينا؟ محنا مبسوطيين بدون جامعة, دوام, شغل محلي... الخ ويعني مرتاحين وبكرة برجع كل اشي زي مكان!
تمام، شعور التعب المؤقت في تعلُّم شغلة أفضل بكثير من شعور راحة وهمي مبطن بالتوتر
والخوف والقلق لأنه الوضع مش معروف متى حيتحسن صح؟
طيب، هلقيت نبدأ بالجد..
كيف بقدر أبدأ أفوت في مجال العمل الحر؟ وأنا معنديش مهاراة ولا بعرف حاجة؟.
يا دوبني فالح في تخصص الجامعة ومعنديش توجه لأي شيء تاني!
تمام صديقي.. هذه المقالة مكتوبة خص نص إلك، ربنا يلهمني أكتب كل شيء مفيد
ويكون واضح لتقدر تبدأ فورًا بعد الانتهاء من قراءة هذا المقال تمامًا.
ما هو المقصود بالعمل الحر؟
ما هو الفرق بين العمل الحر وبين العمل عن بعد؟ وكيف بقدر أضمن حقي في كلا الأمرين؟
العمل الحر: هو العمل بنظام القطعة دون الارتباط مع المُشغل بحقوق غير أجر العمل المُقدم.
يعني لا ضمان وظيفي ولا تأمين طبي، وأيضًا لا يفرض عليك العمل من مكان محدد أو شو تلبس وكل تفاصيل الموظف العادي.
العمل عن بعد بكون إلك كافة حقوق موظفين الشركة بس أنت بتشتغل من مكانك.
بتجري عليك قوانين الشركة وبتقدر تحصل على مميزات أي موظف في الشركة.
كيف بنضمن حقنا؟ عن طريق المنصات مبدأيًا، فكرة المنصة زي السمسار، بتربطك بالموظَّف
ولما تتفق مع أحد العُملاء بتأخد منه الفلوس وبتحطهم عندها طرف ثالث لحد ما تسلَّم المشروع
بعدها المنصة بتأخد 20% بالعادة وبتحررلك باقي المبلغ.
هل هذا يعني إنو ما بصير حالات نصب على المنصات؟ لا بصير لهيك في البدايات عالأقل، حاول تكون على اتصال
مع حد خبير أو صاحب تجربة لتتجنب تقع في هذه المشاكل وما تكون ضحية نصب أو جهل أو عدم معرفة.
2) ما عندي مهارة، ومش عارف شو ممكن يصير عندي! ولا من وين أبدأ!
طيب يا صديقي، الآن بخصوص المهارة فهي من وجهة نظري ممكن تنقسم لنوعين:
أ) مهارة دفينة، علم أنت بتعرفوا بس ما بتعرف كيف توظفوا ليجيب فلوس على المنصات أو أونلاين
بشكل عام مثلًا " مهندس مدني ومهاراتك عالية في برنامج الاكسل" ممكن تشتغل تعمل ملفات اكسل برامج كاملة ومحترمة
بتنعمل على الاكسل، فأنت بهذه الحالة مش بحاجة تتعلم مهارة جديدة قد منتا بحاجة تتعلم
كيف تستثمر مهارتك في هذا المجال وتبدأ أول خطوة. " شبه جاهز"
ب) ما عندك مهارة بالمَرة، طيب بحالتك الأمر مش راح أوعدك إنو سهل لأنه حيكون في البداية عطاء وتضحية
بدون مقابل ملحوظ والوقت برتبط في مدى عزيمتك واصرارك وأخذك للموضوع بجدِّية، بس برضو هنا في نوعين من وجهة نظري:
1- تتعلم مهارة بناءً على الناس المحيطة فيك، أو حُب دفين جواك بس لازمك تستكشفوا وتبدأ فيه
الناس إلي أنت شايفهم وبتسمع منهم قصص نجاح وبحققوا دخل جيد وعرضوا عليك تتعلم لتساعدهم وتطور نفسك. "خيارك أسهل"
2- بدك تبحث عن حَاجة العالم في الوقت الحالي وشو محتاج، كيف الناس بتفكر؟ لوين توجَُه الحياة رايح؟.
شو التخصصات يلي ضمن امكانياتك وقدراتك تدرسها؟ بتدرس الخيارات المتاحة والبدائل
وشو نسبة نجاحك في كل شغلة منهم، بعدها بتختار التخصص المناسب إلك، وتبدأ تتعلم فيه تعلُّم ذاتي "خيارك لوحدك"
رحلة البحث عن الذات بتجي لما تختلط بأشخاص ناجحين، تقرأ كتب لناس رياديين.
تحضر فيديوهات مُلهمة، أفلام تحفيزية وفيها توسيع للأفق، تضلك متابع لمواقع زي موقع فيدلي بينشر أخبار عن العالم حصرية
ممكن تلاقي أشياء تجذبك وتثير اهتمامك، ممكن نملة صغيرة ماشية بحالها بالشارع تلهمك!
هو بس نيوتن يلي ألهمتوا تفاحة يعني؟!
لو عندك حد تتعلم منه، فعال العال بس بدك تأخد الموضوع بجدِّية.
لو ما عندك تعال أقلك يا كبير على
أهم مراجع التَّعلُّم الذاتي العربية والأجنبية، مدفوعة ومجانية:
العربية:
- - موقع إدراك
- - موقع نادي القراءة العلمية
- - موقع رواق
- - أكاديمية الزيروا
- - أكاديمية حاسوب
- - شبكة عبدالله عيد "برمجة"
- - موقع كورسات
- - موقع ملتقى الدارين
الأجنبية:
هل بيلزم تكون مهارتي في اللغة الانجليزية عالية؟ عشان أبدأ بهالمجال؟
طبعًا لا يا صديقي، في هذا الوقت الأدوات والاضافات يلي ممكن تضيفها للمتصفح بتساعد كتير، حتى المترجمين والمحترفين بستخدموها مرات!
فما تقلق، تكون بتفهم الحد الأدنى.. ولو كان صعب بتقدر تستعين بأي شخص ثقة وحيساعدك أكيد "ما تحط العقدة بالمنشار يا على ميزانيته
من أشهر هذه الاضافات لمتصفح كروم:
إيش رأيك تأخد بريك هلقيت؟ وترجع كمان شوية؟ أه وأنا بقول زيك هه، كُلكَ حاجة، شوكلاتة اشي زاكي وتعال عشان نكمل.. اِطوِّلش يا حج بستناك هيني
رجعت؟ ما شاء الله عنك مطولتش كتير
مَضلِّلكاش حجة ها، أنت هلقيت المفروض جاهز يعني! وبلزمك شوية توضيحات عن المنصات صح؟ حاضر.
. راح أقلك هلقيت
كيف تبدأ في المنصات؟
أول حاجة يا عيني، بلزمك تجهز شوية حجات عشان تبدأ صح وما تتغلب زي:
1. صورة شخصية احترافية "بجوال صاحبك الأيفون" يا سيدي
بعينك الله استحمل جميلتوا شوية وعارف إنه حيتأخر عليك بالصور زي دايمًا بس العايز أهبل
طبعًا الصورة تكون في اضاءة جيدة ولو ممكن تكون في مكان يوحي بطبيعة العمل إلي راح تعملوا
مثلًا تعليق صوتي تكون داخل استديو، مهندس حاسوب تتصور قدامك الابتوب "بس تكون تطلع عالكاميرا يعني"
صورني وأنا مش واخد بالي، أو وأنا أبصر شو بعمل وضعية النسر الجارح سيبك منهم بعينك الله، بس هالمرة
ابتسم، خلفية الصورة مناسبة، ولابس بشكل مناسب ولا تنسى مبتسم الله يرضى عليك.
ممكن ترفع صورتك على هذا الموقع وتشوف تقييم الناس من 10، خلي ععندك ثقة بنفسك ودوس ما تقلق موقع لتقييم الصور
2. اكتب وصف أو bio شامل عنك، مهاراتك، خبراتك وقدراتك..
مش راح يكون كتير مؤثر تكتب "جنسك، تخصصك الجامعي، أكلتك المفضلة، أغنيتك المفضلة .. الخ"
الاشي لازم يكون احترافي بطريقة ابداعية دامجة بين الأسلوب القصصي السردي وأسلوب الطرح على شكل نقاط محددة ومهمة.
طبعًا مش حأسيبك تايه هان تقلقش، عشان تقدر تعمل الوصف الخاص فيك بطريقة صحيحة.
شوف الناس كيف كاتبة؟ الناس شو عاملة؟ طبعًا الناس يلي شغالين في تخصص نفس يلي بدك تشتغل فيه.
بتفوت على المنصة وبتكتب كلمة مفتاحية أو مميزة من التخصص يلي بدك تبحث عنه لنفترض "مصمم - Designer" بتكتبها في خانة البحث
بيجيك حسابات ناس تانية.. دوِّر على الناس إلي تقييمها عالي وشوف كيف كاتبة بروفايلها.
بس خلينا نتفق على حاجة كتير مُهمة، الله يرضى عليك.. تنسخش وتلصق عدل، بدون ما تفهم شو مكتوب
أو تحاول حتى تقتبس وتنشئ بروفايلك الخاص! لأنه بروفايلك هو عتبة بيتك قدام الناس يا بكون مرتب ومزبط بخليهم يرنوا
عالجرس يا يمشوا يشوفوا بيت حدا غيرك "وممكن يرنوا ويشردوا تستبعدش زي الصغار عادي
بخوفكاش بس توقَّع إنه يجيك عُملاء وترد عليهم وما يرجعوا يحكوا معك لأكثر من سبب "
هو مش فاهم المنصة لسه، لقى عرض أفضل من عرضك، أنت مش فاهم الشغل.. الخ"
فيعني مش كل ما يجيك اِشعار "هاد لو اج.." هه لا لا بمزح معك مالنا مش من أوليتها تشاؤم يعني زي ما قال صاحبنا روميو "مادام الأملُ طريقًا فسنحياه"
كيفية عمل و تجهيز معرض الأعمال بشكل إحترافي ومميز
والآن سيداتي سادتي ننتقل للجزء الأكثر أهمية وهووو. .. وهووو.. لا غلط مش الأكل ولا النوم يا فالح، نجي لمعرض الأعمال.
3. معرض الأعمال: هاد يا سيدي لازم تجهزلك كم عمل بعينك الله، سواء كان مدفوع أو مجاني
أو تدريبي أنت عاملوا أو حتى ساعدك فيه حد أو يعني "المهم لو اجاك شغل زيو تعرف تدبر حالك"،
بس اوعك تسرق شغل حد تاني خاصة من معرض شخص منافس أو يعني! دبر حالك.
حسب تخصصك، شوف المنافسين يلي شفنا البيو تبعهم كيف عاملين؟ شو حاطين؟
واعمل مُحاكاة مش نسخ لصق، ما تكون شخص بس بقلِّد أبدع بطريقتك وكون أنت!
لإنه عَقد ما حتزبط بروفايلك على قد ما بترفع حظوظك في العمل والقبول في العروض يلي بتقدمها مُستقبلًأ.
4. جهِّزلك سيرة ذاتية محترمة ومش مشكلة لو استعنت بنماذج جاهزة زي الموقع المرفق
، ولو مش غلط تزبط حسابك على LinkedIn حيساعدك مستقبلًا برضو.
موقع لمساعدتك في عمل سيرة ذاتية
هيك خلَّصنا تقريبًا الجانب التأسيسي للحساب، والجزء الظاهر للجميع
كيفية إتقان مهارة الإتصال والتواصل والتفاوض والإقناع وإدارة الوقت والعمل في فريق
نجي لشغلة لا تقل أهمية وهي مهاراتك في الاتصال والتواصل والتفاوض والاقناع وادارة الوقت والعمل في فريق
وتحمل ضغط العمل ومهارة كتابة عرض العمل أو البروبوزل بطريقة صحيحة..
لأسهلها عليك.. لازم تكون متحدث لبق وذكي، تقدر تعرف حاجة العميل وطبيعته وتكتب العرض بطريقة منافسة
لتكون كافية باختيارك من بين الجميع، لقدام حتمر بضغط عمل خاصة موضوع التسليم والددلاين
فلازم تكون بتعرف تنظم وقتك بشكل ممتاز وكاتب مهامك اليومية ومرتب حبل أفكارك لتنجزها بأفضل جودة وكفاءة
وأقل وقت ممكن، وخلي جانب للخطر وحدوث طارئ خاصة عنا في غزة "قصة الكهرباء والانترنت".
بخصوص كتابة البروبوزل أو العرض الخاص فيك، ففيها مدارس ووجهات نظر
من وجهة نظري أذكاها إنك تقتبس حاجة العميل وتصيغها على شكل أسئلة قصيرة
بعدها تبدأ بسرد مهاراتك وخبراتك السابقة وايش بميزك عن غيرك. وفي بعض العروض إرسالك لنماذج الأعمال يكفي!
خاصة التصميم أو التعليق الصوتي، ممكن يكون بربوزلك ضعيف بس نماذج أعمالك بتعبر عن مدى احترافيتك.
فيفضل إنك ترفق نماذج دائمًا ويكون معرض أعمالك قوي.
اجتهد تحصل على تقييم ممتاز، قدِّم أفضل ما عندك.. التقييم بساعدك تظهر بصورة احترافية أكثر
مش ضروري يجي أول جوب من أول بروبوزل.. ممكن تقدم 20 ولا واحد فيهم يزبط،
بعدها يجيك مشروع ميزانيتو أضعاف كل الفرص.. فما تيأس
في حال الحمد لله زبطت أمورك وقدرت تحصل مشاريع وصار في رصيدك فلوس، فما تتعب رأسك من هلقيت
"خليها لوقتها" لإنه فيها كتير تفاصيل خاصة بالتحويل والباي البال ومشاكله،
وممكن تعمل حساب توفير لكل مواطن في بنك فلسطين، وبرضو مش غلط تعمل بطاقة #بايونير "حتلاقيني شارح كيف هنا"
ولتكون المقالة متكاملة، حأرفق روابط
أشهر منصات العمل الحر
الآن، بس لازم تعرف إنهم بنقسموا ل 3 أنواع:
1. منصات العمل الحر، بنزل فيها المشاريع وأنت بتقدم عليها غالبًا زي:
أهم منصات الخدمات المصغرة
2. منصات الخدمات المصغرة، زي بسطة البائع بالزبط، بتعرض خدماتك على شكل خدمات مصغرة
وبتكتب وصف وشو حتقدم بالضبط وبناءً على قوة المحتوى واستخدامك للكلمات المفتاحية بطريقة صحيحة
بيجي الناس أصحاب الأعمال وبحكوا معك، وفيها مدخل في البداية اسمه
"طلبات الخدمات غير الموجودة" أو "Buyer Requests" زي:
أهم منصات التوظيف طويل المدى عبر منصات العمل الحر
3. منصات التوظيف طويل المدى، يعني بتكون موظف عن بعد تقريبًا.
وممكن فرصة وحدة تغنيك عن كل منصات العمل الحر والوظائف حتى! زي:
- المنصة الاولى للتوظيف
- المنصة الثانية للتوظيف
- المنصة الثالثة للتوظيف
- المنصة الرابعة للتوظيف
- المنصة الخامسة للتوظيف
طبعًا كل موقع من هدول إله خصوصيتوا، وطريقة التقديم الخاصة فيه وتفاصيل بتميزه عن غيره
ومش ضروري تكون نشيط عليهم كلهم.. ممكن شخص يزبط معه موقع والتاني لا، فأنت سيد الموقع بالأول والأخير.
إذا وصلت لهان، معناتها قضيت يمكن ساعة من وقتك أو أكثر؟ وعندك صدق نية وبتحاول تلاقي طرف للخيط صح؟
هالمقالة أخذت معي ما يقارب 3 ساعات كتابة.. حاولت يكون شامل وواضح.
ولهيك راح أقدملك عرضي يلي هو حقك عليَّا وهو إني راح أساعدك في البداية لحد ما توصل للقدر الكافي من المعرفة
وتصير تعتمد على نفسك بعدها بإذن الله، راح أساعدك بكل ما بقدر من علم وخبرة متواضعة في هالمجال
وعنجد من أعمق نقطة في قلبي شُكرًا لإنك بتحاول.. محاولاتك هذه هي يلي حتخليك توصل
صدقني، محدش مؤمن بالمنطق بترك حياته للصدفة.. ابدأ
تستناش.. هيك هيك عمر بيمشي ومش حيستنى، وآخريتك حتوصل.
وليكون هالجُهد مُكتمل، لازم يتكلل بشُكرنا لأصحاب الفضل يلي زرعوا فينا الأمل وعلَّمونا هالعلم الرائع
وأخص منهم مدربنا القدير البشمهندس Khaled S. Nabhan .. ربنا يجعل هالأعمال في ميزان حسناتك وينفعنا فيه والجميع
كتب هذه المقالة المهندس الرائع والملهم محمد ربيع جرادة.
لمتابعة قناتنا على التليجرام اضغط هنا
لمتابعة قناتنا على اليوتيوب اضغط هنا
#كيف_أبدأ #العمل_الحر #شير_في_الخير #فريلانسر #العمل_عن_بُعد #منصات_العمل_الحُر #مستقل #خمسات #أب_وورك #فايفر #بعيد #عمل_عن_بعد #عمل_حُر
تعليقات
إرسال تعليق